23 novembre ’80:
chi ha ditto ca la paura fa sulo 90?
‘na bomba, ‘na botta, ‘no truono,
‘na paura senza nome, ‘no dolore senza suono,
90 seconde senza parla’, 90 seconde senza sente,
‘na eternità addò non se capivo niente.
“C’ha successo?” “Che cosa?” “Lo terremoto?”
E ogni comune d’Irpinia a tutti è noto.
23 novembre ’80:
chi ha ditto ca la paura fa sulo 90?
“Fuje!” “Curre!” Lo terrore era ‘n’unica parola:
non te gerave arreto pe’ paura d’esse’ sola.
pe’ lo ccorre annommennave tutte le sante,
senza de te ferma’ contave ancora pe vede’ se ce steveno tutte quante.
Tuorno tuorno era sulo prete, poreva e fumo ianco,
non conuscive a nisciuno pecchè tutto era chino de sango.
23 novembre ’80:
chi ha ditto ca la paura fa sulo 90?
Tanta peskune ‘nderra erano le ccase,
non tinive ‘na porta manco pe’ pote’ dice “Trase!”,
quaccuno deceva “Dormo dindo a la macchina mia”,
l’ate no, tutte quante ‘mmiezzo a la via.
Si aprive l’uocchie vidive le stelle,
sintive le chiante ma, tutte insieme, come stevemo belle!
23 novembre ’80:
chi ha ditto ca la paura fa sulo 90?
Arrevaro le soldate co’ le skatolette e le coperte,
ma tu putive ‘nfoca’ ‘no figlio sulo co’ le bbrazze aperte.
Macerie e prete era tutto: isso steva llà sotto
e tu sintive ca puro lo core se n’asceva da pietto.
Mano a mano ca la speranza deventava dolore
tu priavi ca te lo trovavano…
sulo pe’ ce porta’ ‘no fiore…
23 novembre ’80:
chi ha ditto ca la paura fa sulo 90?
D’austo ‘no furno, de vierno ‘na iacciera: queste le case c’arrevaro, le prefabbricate de lamiera.
Co’ le ‘mbruoglie s’arrevaro a piglia’ lo contribbuto
addeventato casa pe’ poche e fortuna pe’ chi se l’ha fottuto.
“Non ‘mborta, voglio mangia’ pane assutto, ma ha da esse’ lo mio,
tanto prima o poi ogni anema va ‘nnanze a Dio”.
23 novembre ’80:
chi ha ditto ca la paura fa sulo 90?
Domeneca: le sette e trentacingo de la sera,
‘na sera ca spiere ca cchiù non s’avvera,
pe’ la forza c’ha stata veramente troppa,
com’a lo dolore a vede’ le tittere sotta e le pavimente ‘ngoppa,
‘no ricordo da tutte cchiù lontano ca ci sia,
‘no ricordo ancora presente senza manco ‘na fotografia.
23 novembre ’80:
chi ha ditto ca la paura fa sulo 90?